miércoles, 6 de enero de 2010

¡Anda con tientu!



Tú non yes de pequí, ¿eh?, glayó-y cuando Sindo foi quien a abrise pasu hasta la barra pa pidir una segunda copa. La dueña, que yera muncho más nueva de lo qu´él camentara viéndola de iones, mirábalu de llau, zaramicando unos güeyos azules y vacunos como si tuviera callibrándolu.
Vaya pregunta más tonta, pensó Sindo dando un sorbiatu a la copa: yera más qu´evidente qu´él nun era de pellí. La que sí paecía ser d´allí de toa la vida yera ella; combayona y risona, mandaba tres la barra como una gran abeya reina a la que toos querían tocar o, polo menos, ser dignos de la so risada espléndida. Saludando col pulgar a unos y a otros cola mano abierta, paecía ser la menos foriata d´ente tou aquel xentíu de color que se ximielgaba al son de la música faciendo entechocar nel aire les xarres de cerveza.
Pues anda con tientu, rapaz, dixo-y sorpresivamente la mujer, dexando de parlar col cliente acoldáu na barra que taba a la vera de Sindo. Al oyila falar asina, l´home, un paisanu yá cuarentón con un peyellu tan negru que garraba visaxes azulencos, mirólu con curiosidá; como si reconociera dalguna marca preocupante na cara de Sindo, afirmó varies veces cola cabeza, dando-y asina una mayor importancia al estrañu avisu de la mujer. Sindo quedó clisáu al oír aquello. Cuando se repuso de la sorpresa y foi a entrugar a la paisana qué yera lo que realmente quería decir, ésta yá marchara al otru estremu de la barra a atender a otros clientes.

Miguel Rojo. “Cuentos pa un turista blancu”. Ámbitu, 2006.